Tsenguluso ya u tuluwa ha maipfi a mirole ane a talutshedza vhuimo ha nyaluwo kha Tshivenda

Abstract

Ndivho ya ṱhoḓisiso iyi yo vha u sengulusa nga ha u ṱuluwa kana u ngalangala ha luambo kana maipfi a buletshedzaho u swikiwa na u pfukwa ha mirole ya nyaluwo kha ṅwana wa mutukana kana musidzana u bva vhuṱukuni u swika vhukalahani na vhukeguluni. Themo dza u ṱalusa miṅwaha ndi dza ndeme vhukuma ngauri dzo hwala vhuḓifhinduleli ha matshilisano na mvelele vhu shumaho vhune ha lugisela lwendo lwa ṅwana muṅwe na muṅwe u bva vhuṱukuni u swika vhuhulwaneni. Muṱoḓisisi o sengulusa ṱhoḓisiso iyi kha Masipala wa Tshiṱiriki tsha Vhembe, une wa wanala Vunduni ḽa Limpopo Afrika Tshipembe. Datha yo kuvhanganywa u bva kha zwigwada zwo fhambanaho kha vhavhudziswa vha miṅwaha ya u bva kha fumimalo u ya nṱha, vho katelaho vhanna, vhafumakadzi, na vhaaluwa vhane vha imela lupfumo lwa tshenzhemo dza vhutshilo. Tsedzuluso iyi yo shumisa nḓila ya u vhunanguludzi ine ya pfi phephosivi ine muṱoḓisisi a nanguludza vhananguludzwa uya nga nḓivho yawe na kuvhonele kwawe. Vhavhudziswa vho nanguludzwa u bva kha vhubvo ho fhambanaho ha matshilisano, hu tshi katelwa miṱa ya vhuhosi, zwivhidzo zwa vhurereli, zwiimiswa zwa pfunzo, madzangano a mitambo, na zwigwada zwa polotiki. Ṱhoḓisiso iyi ya khwaḽithethivi yo shumisa zwishumiswa zwivhili zwa ndeme zwa u kuvhanganya datha, zwine zwa vha mbudziso dzo dzudzanywaho na inthavhiyu ho livhanywa zwifhaṱuwo. Lupfumo lwa datha ya vhuimo yo kuvhanganywaho lwo mbo ḓi senguluswa hu tshi shumiswa tsenguluso ya thero, zwa tendela u ṱoḓisisa ho dzikaho ha phetheni na thero dzine dza vha fhasi. Ṱhoḓisiso iyi yo wana uri maipfi a miṅwaha ane a sumbedza mirole ya nyaluwo kha lushaka lwa Vhavenḓa a khou ngalangala. U ngalangala ha maipfi aya zwi vhangwa kha zwithu zwo vhalaho zwine zwa katela u pfulutshela ḓoroboni, ṱhuṱhuwedzo yo phaḓalalaho ya luambo lwa Luisimane, u engedzea ha mbingano dza mvelele dzo fhambanaho, u gonya ha nyanḓadzamafhungo ya matshilisano, na maitele a ngaho muvango.