Ku paluxiwa ka vaxisati eka ntlango wa rhadiyo wa Xitsonga hi ku kongomisa eka ntlango wa tlanga hi ku siyerisana wa Mina hi mina eka Munghana Lonene FM

Abstract

Ndzavisiso lowu wu xopaxopile ku paluxiwa ka vaxisati eka ntlango wo tlanga hi ku siyerisana wa swiphemu wa Mina hi mina. Xikongomelokulu xa wona i ku paluxa hilaha vatlangi vaxisati va paluxiwaka hakona eka Mina hi mina hi xikongomelo xo kuma loko ku ve mitirhorimbewu leyi vatlangi va nyikiwaka yona ya fambisana na ndhavuko wa vona wa Vatsonga ke; no tlhela wu kuma loko ku ve ku na ku cinca ku fambisanaka ni cinco lowu wu nga kona hitlhelo ra swa matshamelo, swa mabindzu ni swa tipolitiki. Leswi swi susumetiwa hi ku va Vatsonga va ri ni vurhangisavaxinuna naswona hi xona xivangelo lexi endlaka leswaku vaxisati va nyikiwa mitirho leyi hlohlotelaka vurhangisavaxinuna erixakeni. Ndzavisiso lowu wu tirhisa maendlelo ya nxopelo wa vugingirikelaxisati wa matsalwa (lama humaka eka Thiyori ya Vugingirikelaxisati) lama xopelaka vaxisati eka matsalwa. Tshako ra ndzavisiso lowu ri tshamile eka swikholwana swa ndhavuko leswi vulaka leswaku vaxisati a va na nkoka, vo lavelela ka wanuna naswona a hi mitirho yingani va nga yi tirhaka handle ka ya xisati ntsena. Ndzavisiso lowu, wu kumile leswaku vurhangisavaxinuna byi tshikelela vaxisati. Tlhandlakambirhi, ndzavisiso wu kumile leswaku vaxisati lava va tshuriwaka hi vatsari eka Mina hi mina va leswi va nga xiswona hikokwalaho ka vurhangisavaxinuna lebyi va hanyaka no huma eka byona. Nakambe, ndzavisiso lowu wu kumile leswaku ku na swikoweto swa ku cinca loku ku nga kona ku humaka eka maendlelo ya xintu kumbe ya xikhale eka vaaki hitlhelo ra mapaluxelo kun’we mitirho hikuva van’wana vaxisati eka Mina hi mina va nyikiwa mitirho leyi khale a yi tirhiwa hi vaxina